Iciar Irurtia Orzaiz

Gora Gora Fest 2024 dagoeneko historia da. Baina historia polita. Izan ere, lau urteko ibilbidearen ondoren, euskarazko kultur ziklo honek lekua egin da jada Nafarroako udazkeneko agendan. 2.500 pertsona inguruk – iaz baino bi ehunen gehiagok – parte hartu dute Euskarabideak proposatu eta Tdiferenciak antolatutako ekintzetan. Azaroaren 2tik abenduaren 8ra, magia, dantza, antzerkia, ipuinak eta musika Nafarroan zehar ibili dira iparraldetik hegoaldera. Jabier Arakama Urtiaga Euskarabideko zuzendari gerentearekin hitz egin dugu, 2020an Euskararen Nazioarteko Eguna ospatzeko abiatu zen zikloaren orainaz eta etorkizunaz.

Gora Gora Fest kultur zikloak 2021ean ekin zion bere ibilbideari. Zein helbururekin?

Gora Gora Fest abenduaren 3an ospatzen den Euskararen Nazioarteko Egunarekin lotuta dago. Helburu nagusia Nafarroa osoko haur eta nerabeei euskarazko jarduera kultural dibertigarri eta interesgarriak eskaintzea da, eta horregatik dozenaka ikuskizun antolatzen ditugu gure lurraldeko eskualde guztietan. Hizkuntzaren normalizaziorako, aisialdia eta denbora librea oso garrantzitsuak dira, eta horretan eragin nahi du programa honek.

Lehenengo ediziotik, Tdiferencia arduratzen da jaialdiaren programazioaz. Zer ekarpen egiten dio konpainiak ziklo kultural horri?

Hasieratik, oso gustura egin dugu lan elkarrekin. Talde-lanean aritzen gara, bakoitzak bere ekarpenak egiteko aukera du, eta emaitza aberasgarria izaten ari dela uste dugu. Gure nahi eta beharrak zeintzuk ziren berehala ulertu zuten, eta urtero eskaintzen dugun programazioan nabaritzen da. Tdiferencia enpresako profesionalek haur eta nerabeen ekosistema oso ongi ezagutzen dute eta denon artean jakin izan dugu adin ezberdinetara egokitutako eskaintza polita, entretenigarria eta baloreak erakusten dituena osatzen.

Aurtengo edizioan, ikuskizunetara joan den jende kopurua iazkoa baino handiagoa izan da. Zalantzarik gabe, datu ona…

Egitasmo hau martxan jarri zenetik, urtez urte gero eta jende gehiago gerturatu da, eta hori oso esanguratsua da. Gora-Gora Fest Nafarroako herri askotan eskatzen eta eskaintzen den programa da, eta guraso aunitz haien eskualdeko herrietara joaten dira seme-alabekin, ikuskizunez gozatzeko asmoz.

Nire ustez, honek argi erakusten du gizartean dagoen behar eta nahia betetzen duela programak. Ez guztiz, noski, hau eragile askoren lana delako, baina norabide onean goaz.

Pentsatzera eramango gintuzke Gora Gora Festak Nafarroako kultur programazioan lekua egin duela?

Zalantzarik gabe. Nafarroako herri askotan (batez ere, urtean zehar euskarazko programazio urria dagoenetan) bertako euskaltzaleek badakite, udazkenarekin batera, kultur ziklo hau datorrela, eta oso harrera ona dauka.

Euskarazko kultura Nafarroako zonalde guztietara eramanez, gainera, euskararen ezagutza, erabilera eta prestigioa zabaltzeaz gain, nafarren arteko gizarte eta lurralde kohesioan sakontzen ari garela sinetsita gaude. Beraz, bide honetan jarraitzeko asmoa daukagu.

Datorren urteko edizioan pentsatzen hasita? Aurreikusitako berritasunik?

Formatuan, aldaketa handirik ez da egonen. Programazio berria prestatze aldera, kontuan hartuko dugu hurrengo asteetan eginen dugun 2024ko edizioaren ebaluazioa, zertan hobetzen ahal dugun jakiteko. Eta, zalantzarik gabe, eskaintza zabaltzen jarraituko dugu, ahalik eta herri gehienetara iritsi ahal izateko. Nafarroako haur eta nerabeek euskarazko kalitatezko aisialdia izatea merezi dutelako.