Iciar Irurtia Orzaiz

Lan-taldeak azken txanpari ekin dio jada. Eszenatokira salto egiteko egunak kontatu eta xehetasun guztiak zehazten saiatzen da. Ugari dira, eta lana, zorrotza. Tenpoak, koreografiak, jantziak, eszenografia edo taulen gaineko kokapena. Onin y el Misterio del Teatro / Onin eta antzerkiaren misterioa antzezlana Gayarre antzokian izango da ikusgai hiru aste barru. Lan handiko egunak dituzte aurretik; errepasoak, soinu-probak, argiztapen-diseinua eta jantzien azken ukituak. Oso gutxi falta da… Funtzioa hasteko!

Atrezzoak ikuslea Atxondotik Gayarrera eramatea, funtzioan bete-betean murgilduaraztea eta Onin eta bere koadrila rekin abenturak bizitzeko aukera ematea. Aktoreak eszenatokian aise mugitzea, eszenografiara ohitzea eta dena aurreikusitako denboren arabera egitea. Banakako eta taldeko lan-ordu asko behar dira helburua lortzeko. Taldea jarraitu dugu bere entseguetako batean. Eta hemen azalduko dizugu…

Beriaingo Kultur Etxe ko eszenatokia mugimenduz beteta dago. Batzuk gora eta besteak behera. Gainbegiradak, neurriak hartzea, bildu eta apaindu egin beharra dago. Presarik gabe, baina etenik gabe. Eskailera baten gainean igota, Manoli -modista- eszenatokiaren dekoratuari bere magia emango dien gortina distiratsuak prestatzen ari da. Conchi Redin (Tdiferencia) txizontziak kutxetatik ateratzen ari da, eta Maite Redin ek (Tdiferenciako kide eta antzezlanaren zuzendariak) arretaz ipintzen ditu jantziak esekigailuen gainean. « Ez, horrela ezin dugu utzi. Besaulki-patiotik ez da ikusiko… ». Fermin Matilla -goitik behera beltzez jantzita- atsedenik gabe dabil eszenatokiaren gainean, alde batetik bestera: kakoak jarri, pertxak doitu eta oihalak jartzen ditu aldagelako horma izango denaren gainean. Buruz errepasatzen ditu eszenografiaren mugimenduak, eta agertokia ikusleek ikusi gabe zeharkatzeko modurik azkarrena zein den aztertzen du.

Onin eta bere lagunak , berriz, testua errepasatu, barre egin, abestu eta solasaldi entretenigarrian dabiltza. Irati Muñoz – Onintza – , Iban Alguea – Erik -, Celia Fañanás – Sara –, Naiara Azpilkueta – Ainara – eta Kimetz Etxabe – Aimar – dira taldeko kideak. Ibon Martinen taldeari bizia emango dioten bost aktoreak dira. Koadrilak Afrikara bidaiatu zuen, Halloween gaua gozatu zuen, basoaren misterioa deskubritu zuen edota surf txapelketan parte hartu zuen. Antzerki abentura honetan, koadrila Iruñeko Gayarren murgilduko da, eta bertan, jakin-minak eta misterioak bat egingo dute istorio dibertigarri bat kontatzeko.

Goiza frenetikoa da. Izan ere, lan ugari izateaz gain, nerbioak ere badaude. Estreinaldia hurbiltzen ari da, eta xehetasun asko argitu behar dira. Goizeko hamaikak dira eta ordu erdi eskasean, ikuskizunaren argiztapenaren diseinatzailea –Acrónica Producciones taldeko David Bernués – antzokiraino hurbilduko da bere lana osatzeko.

Beraz, funtzioa berriro hasi arte geratzen den denbora animoak lasaitzeko aprobetxatzen dute. Eszenatoki gainean kafe bat eta patata tortilla elkarbanatu dute zuzendariaren urtebetetzea ospatzeko. Baina aisiak hogei minutu besterik ez du iraun, eta berriro eszenara atera aurretik, antzezleek berotze-ariketei hasiera ematen diete.

Isiltasuna. Funtzioa hastera doa. «Soinurik ez dugunez, nik jarriko dut musika» , zuzendariak dio besaulkitik. Eta, momentuan, koadrila eszenatokiaren gainean agertzen da.

Gaurkoa eszenografiarekin egiten duten lehen entsegua da eta horrek bere zailtasuna dakar. Antzeztaldea aldaketa guztietaz arduratzen da eta, gainera, tenpoak oso kontrolatuak izan behar dituzte. « Oso motel zoazte… Eta kontuz eszenografia jotzearekin! Hemendik zuek ikusten ez dituzuen arazoak ikusten ditugu guk… », dira zuzendaritzak besaulki-patiotik apuntatzen dituen ohartarazpenetako batzuk. Aldi berean , Conchi Redin ek estreinaldiaren aurretik zehaztu beharreko xehetasun guztiak idazten ditu, eta David Bernués eszenaratzeari begira dago, ikuskizunaren argiztapena behatuz.

Maite Redin zuzendariak eta Ainhoa Ruiz zuzendari laguntzaileak eszenaratzea zuzentzen dute eta talde artistikoaren mugimenduei zehatz-mehatz erreparatzen diete: « Berriro errepika dezakegu eszena hau? ». « Bai, hori da. Horrela ondo doa». « Zu eszenografiaren parte zara. Momentu honetan, kapa eta antifaza jartzeko denbora duzu ».

Arratsaldeko ordu biak pasata, eszenografiarekin egindako lehen emanaldia amaitzen da. Orain, lana aztertzeko unea da. Ainarak soinekoa aldatu beharko du, Sarak, lokarridunak beharrean, gomadun zapatilak jantzi beharko ditu, eta taldeak laguntza eman beharko dio Aimarri protesia egokitzeko. Doikuntza gehiago eta lan asko egiteke dago oraindik. Onin y el Misterio del Teatro / Onin eta antzerkiaren misterioa antzezlanaren estreinaldia arrakastatsua izan dadin behar den guztia. Eta hala izango da. Horretaz ziur gaude.

Onin eta Antzerkiaren Misterioa Gayarre antzokian estreinatuko dute: abenduaren 30ean, gaztelaniaz, eta urtarrilaren 2an, euskaraz. Eta sarrerak agortzear daude!