Iciar Irurtia Orzaiz-ek idatzia eta Celia Fañanás-ek itzulia

Nirekin betirako egongo al zara? Beste mutil batzuekin egongo zara? Eta beste neska batzuekin? Seme-alabak izan nahi dituzu?

Ez dakit…

Orduan, zer nahi duzu?

Libre izan nahi dut.

Nik ere libre izan nahi dut!

Erabakiak hartzeko eta ekintzak kanpoko inposiziorik gabe aurrera eramateko aukera izan nahi dut. Horrek arriskuak hartzea eta nire erabakien pisua eramatea eskatzen badu ere. Izan ere, askatasuna ez da nahi duzuna egitea. Aske izatea bidea norberak nahi duen bezala egitea da , erabakitzen duen lekutik eta norberak aukeratzen duenaren eskutik.

Honetaz guztiaz aritzen dira Tdiferencia -k ekoiztutako eta Maite Redin -ek idatzi eta zuzendutako Tailoviu -ko protagonistak. Berrogei minutu pasatxoan, familia osoari zuzendutako obra honek mutiko eta neskato baten artean sortzen den maitasun istorioa kontatzen du, bere haurtzarorik samurrenetik abiatuta. Jolastu, barre egin, partekatu eta elkar maite dute, eta hazi eta garatu ere egiten dira.

Nerea Bonito  eta  Xabier Artieda aktoreak dira neskato eta mutiko honen istorioa taularatzen dutenak: haien lehen zezelkadak, aurkikuntzak eta beldurrak partekatzen dituztenak. Jolasean dibertitzen dira -neskatoa «polizia» da eta mutikoa «lapurra»-, neskatoa da txori baten gorotzak mutikoaren begian jotzen duenean barre egiten duena, baita negarrez ikusten duenean muxu ematen diona ere. Hunkitu egiten dira, urduri jartzen dira. Izan ere, elkar gustoko dute : « nik gustoko dut eta berak gustoko nau ».

Redin «txiki» horien istorioaz baliatzen da maitasun erromantikoa desmitifikatzeko. Haurren maitemintze aren aurrean errespetua eta enpatia ezinbestekoak direla uste du, eta istorio honen bidez ohiko jokabide ereduak aldatu eta indarkeria matxista prebenitzeko ahaleginak egiten ditu.

Izan ere, Tailoviu -n, neskatoa da iniziatiba hartzen duena, barre egiten duena eta musu ematen duena. Ez da neskato koldarra, ezpata zorrotik ateratzen imajinatzen du bere burua, eta borroka-arteak praktikatzen ditu.

Bien artean konturatzen dira elkar maitatu dezaketela «pertsona nagusien» urratsak jarraitu gabe. Enekok ez du neskatoa salbatu behar berak maita dezan. Eta berak, aldiz, ez du ez ederra, ez garaia, ez argala izan behar. Maitasuna errespetua , onarpena eta aitormena bai da.

Elkarrekin hazten dira, ikasketak, krispetak eta algarak partekatzen dituzte. Eta bakoitzaren interesek bide desberdinak hartzen dituztela ohartzen dira. Horrela hasten dira lehen eztabaidak… Haien arteko harremanaren inguruko lehen kontuak planteatzen hasten dira. Betirako elkarrekin egongo ote diren, beste neska-mutil batzuekin aterako diren edota seme-alabak izan nahi dituzten… Eta, orduan, bien artean , ondorio berera iristen dira: aske izan nahi dute. Batek Afrika ezagutu nahi du eta besteak Asiara bidaiatu. Nomada izan nahi du batek, eta txakur bat izan. Besteak, lorategi bat duen etxea eta hogeita bost katu izan nahi ditu. Bata, azukrea. Bestea, gatza.

Haien bideak bereizten dituzte. Bakoitzak bere ibilbideari ekiten dio, bere interes, gustu eta konpainiekin. Baina dena errespetuz eta, batez ere, maitasunez . Elkar agurtu eta elkar maite dute : Tailoviu. Beti Tailoviu.