Iciar Irurtia Orzaiz

Bere azalaren kolorearengatik errespetu faltak pairatzen dituen jatorri mexikarreko Onintza gaztearen istorioa izan da Orkoiengo Auzalar Ikastetxeko literatur lanaren protagonista. Euskaraz ikasten du, ile iluna du eta bere ama eta Vicenterekin bizi da, bere aitona ez den «aitona». Errespetuz, inklusioz, berdintasunez, enpatiaz eta elkartasunez betetako istorio honek irabazi du Tdiferenciak antolatutako Lehen Hezkuntzako haurrei zuzendutako IV. Literatur Lehiaketa. Maiatzaren 2an, Eskola Jazarpenaren aurkako Nazioarteko Egunean, Alaia Urbisu Apellánizek, Lehen Hezkuntzako 4. mailako ikasleak, jaso zuen saria -ikasturte osoaren izenean- Tdiferenciako aktore Celia Fañanásen eskutik, «Ama, hauxe da» lanagatik. Sentsibilitateagatik, idazkeragatik eta, halaber, irakasleek lan kolektibo hau egiteko izandako inplikazioagatik aukeratua izan zen idazlan hau. Ondoren, Lehen Hezkuntzako lehen eta bigarren zikloko ikasleekin batera, Burua txoriz beteta / Con la cabeza llena de pájaros antzezlana ikusteko aukera izan zuten, bidaiez eta ametsez, inklusioaz, jasangarritasunaz eta desberdintasunarekiko errespetuaz hitz egiten duen ikuskizuna. Sariketara ehun bat lan aurkeztu ziren, gaztelaniaz eta euskaraz.

Lehiaketaren laugarren edizio honetan, ikasleek beren ametsetako eskola nolakoa izatea nahiko luketen hausnartzea nahi zuen Tdiferenciak. Parte hartzen zuten ikastetxeetako ikasleei beren literatura-lanean honako hitz hauek sar zitzatela eskatu zitzaien: berdintasuna, elkartasuna, enpatia, maitasuna, errespetua eta aniztasuna. Itsasoaren hondoan dagoen ikastetxe batean haztea gustatuko litzaiekeen, kolore askokoa eta berdintasunez betea legokeena. Edo hodeietan kokatutako ikastetxe batean ikastea nahiago bazuten, jazarpenik gabe, konfeti ugarirekin, solidarioa, enpatikoa eta berdintasunezkoa. Eskola atsegina, dibertigarria eta berezia. Literatur lehiaketa honetan parte hartzeko ideia laugarren mailako tutoreek -Koldo Leozek eta Irati Ibinagak hain zuzen- sortu zuten, ikasleak inplikatu baitzituzten elkarrekin istorio bat pentsa zezaten. “Denbora askorik ez genuenez, laugarren mailako bi gelen artean ipuin bat egitea erabaki genuen; batek hasiera idatzi zuen eta besteak bigarren zatia. Sartu behar ziren hitzak zozketa bidez banatu ziren eta umeek, taldeka, euren ideiak eman zituzten”, azaldu zuen Irati Ibinagak. Ondoren, irakasleak arduratu ziren ideiak ordenatzeaz eta idazten laguntzeaz.

Tdiferenciak, ikasgeletan eman daitezkeen indarkeria mota guztiak prebenitzeko duen konpromisoari jarraiki, Lehen Hezkuntzako haurrei zuzendutako Literatur Lehiaketa antolatzen du 2020tik aurrera.

Burua txoriz beteta / Con la cabeza llena de pájaros -Ainhoa Ruiz eta Iban Alguea protagonista dituen Maite Redinen obra- bidaiez eta abenturez mintzo da. Ametsez, desioez, askatasunaz, fantasiaz, aniztasunaz, berdintasunaz eta errespetuaz. Wada eta Liria pertsonaiek istorio zoragarri hau kontatuko dute, desio onez, emozioz, oroitzapenez, intrigaz eta magia ugariz betea dagoena. Pobreziaz, goseaz eta desberdintasunaz ere hitz egiten dute. Eta, halaber, jasangarritasunaz eta inklusioaz. Desberdintasunaren eta errespetuaren garrantziaz. Hitzaren ahalmenaz eta hausnarketaren garrantziaz. Magiaz eta emozioaz.