Iciar Irurtia Orzaiz

Tdiferenciak estreinatu berri duen musikalean, Celia Fañanás printzesa baten azalean sartzen da. Baina ez da printzesa arrunta. Bere ametsa ez da printze batekin ezkondu eta bizitzea, eta ez du eperrik jaterik espero. Planeta salbatu nahi du; animaliak gatibutasunetik askatu eta ozeanoak plastikoz garbitu . Nafarroako aktoreak Errauskine Rock en papera egiten du, printzesa solidarioa, enpatikoa, konprometitua eta oso indartsua dena. Segi irakurtzen, berak kontatzen digu eta…

Tdiferenciaren pertsonaiaren bertsio rockeroari bizia ematen diozu, nolakoa da zure Errauskine?

Gure Errauskine zailtasun ugariri aurre egin behar izan dien neskatoa da, baina, hala ere, aurrera jarraitzen duena, inporta zaionaren alde borrokatzeko gogorik galdu gabe. Antzezlanean bere jolas eta momentu tristeekin bizi den neskato bat ikusi ahal izango dugu, baita neska helduago bat ere, ideiak eta lehentasunak argi dituena.

Zerk bereizten du ipuin klasikoaren bertsiotik?

Ipuinean bezala, ama hil egin zaio eta aita kanpoan dauka. Kasu honetan, aitak etxetik kanpoko lana lehenetsi behar izan du Errauskineri bizitza hobea eman ahal izateko, gaur egun geroz eta guraso gehiagok egin behar duten bezala. Errauskine oso triste jartzen du horrek, familia faltan botatzen duelako. Gainera, ipuinean bezala, amaordearen ardurapean geratu da, nola tratatu ez dakiena, eta ahizpaordeekin batera bizi da. Gure istorioan, ordea, laurek jatorrizko istorioan baino askoz amaiera itxaropentsuagoa duen abenturari ekiten diote. Errauskinek bere inguruko isekak jasaten ditu gero eta zaurgarriagoa eta zaborrez betea den planeta zaintzeko borrokatu nahi izate hutsagatik; tratu txar eta esplotazio egoeretara behartuak diren animalia guztien eskubideen alde borrokatzeagatik. Bestetik, gure bertsioan maitasun istorio bat ere badagoen arren, gure printzesa ahaldunduago dago, indartsuagoa eta independenteagoa da, baita iniziatiba hartzeko gai ere.

Celia, bietako zeinekin geratuko zinateke?

Zalantzarik gabe, gure bertsioarekin geratzen naiz. Hunkitu egiten nau haur horrekin konektatu ahal izateak eta, haren bidez, agian itxaropen pixka bat erakutsi ahal izango diet beren burua identifikatuta senti dezaketen edo antzeko egoeretatik pasatzen ari diren haurrei; bakarrik sentitzen direnei. Gure Errauskine bere nortasuna galdu gabe komunikatzeko eta bere interesak defendatzeko gai den printzesa da, horrek asko sufriarazten badio ere, eta hori asko miresten dut.